ប្រញាប់ឡើង នៅសល់តែជាងពីរខែទៀតប៉ុណ្ណោះ ការទទួលពាក្យអាហារូបករណ៍រដ្ឋាភិបាលឥណ្ឌានឹងត្រូវបិទ - លោកវិទូ

ព័ត៌មានថ្មីៗ

សូមចូលរួមបណ្ដាញតេឡេក្រាមលោកវិទូ៖ https://t.me/lokavidunews

Wednesday, November 27, 2019

ប្រញាប់ឡើង នៅសល់តែជាងពីរខែទៀតប៉ុណ្ណោះ ការទទួលពាក្យអាហារូបករណ៍រដ្ឋាភិបាលឥណ្ឌានឹងត្រូវបិទ

និស្សិត គៀវ ម៉េងគ័ង និងព្រះតេជគុណ យុន ប៊ុនយ៉ុម ក្នុងពិធី 'កម្មវិធីតម្រង់ទិសដៅ ឆ្នាំ ២០១៩' រៀបចំដោយ ស្ថាបនអាហារូបករណ៍ឥណ្ឌា ICCR នៅ Institution Club of India, ទីក្រុងញូវដែល្លី, ១៣ វិច្ឆិកា ២០១៩ ។

លោកវិទូ | ថ្ងៃ ៤᧡១ ឆ្នាំកុរ ឯកស័ក ព.ស. ២៥៦៣ | ២៧ វិច្ឆិកា ២០១៩
អាហារូបករណ៍រដ្ឋាភិបាលឥណ្ឌា (ICCR) សម្រាប់សមណនិស្សិត-និស្សិតខ្មែរ ឆ្នាំសិក្សា ២០២០-២០២១ ដែលបានប្រកាសបើកទទួលពាក្យ កាលពីពាក់កណ្ដាលខែវិច្ឆិកាកន្លងទៅ នឹងត្រូវបិទឈប់ទទួលពាក្យ នៅថ្ងៃសុក្រ ទី ៣១ មករា ២០២០ ។ ដោយឡែកសម្រាប់ថ្នាក់បណ្ឌិត ថ្ងៃផុតកំណត់ទទួលពាក្យគឺ ថ្ងៃទី ៣១ កក្កដា ២០២០ ។

ជារៀងរាល់ឆ្នាំ ឥណ្ឌាបានផ្ដល់អាហារូបករណ៍ចំនួន ២៣ កន្លែងសម្រាប់សមណនិស្សិត-និស្សិតខ្មែរ ដើម្បីបន្តការសិក្សាជាន់ខ្ពស់នៅប្រទេសឥណ្ឌា គ្រប់មុខវិជ្ជា (លើកលែងតែវិជ្ជសាស្ត្រ និងទន្តសាស្ត្រចេញ) និងគ្រប់កម្រិតសិក្សាចាប់ថ្នាក់បរិញ្ញាបត្រឡើងទៅ រហូតដល់ថ្នាក់បណ្ឌិត ។

អាហារូបករណ៍នេះមិនគិតថាជាព្រះសង្ឃ ឬសិស្សនិស្សិតធម្មតាទេ អាចដាក់ប្រឡងយកអាហារូបករណ៍បានទាំងអស់ ។ ការប្រកួតប្រជែងយកអាហារូបករណ៍ មានលក្ខណៈធូរជាងអាហារូបករណ៍របស់ប្រទេសមួយចំនួនដូចជា ជប៉ុន ចិន កូរ៉េ អូស្ត្រាលី ។ល។ ដោយសារចំនួនអ្នកដាក់ពាក្យប្រឡងតិចជាង ។ នេះជាការណ៍កម្រណាស់ ដែលព្រះសង្ឃសមណនិស្សិត មានសិទ្ធិដាក់ពាក្យប្រឡងយកអាហារូបករណ៍របស់រដ្ឋាភិបាលឥណ្ឌា ដ៏វិសេសវិសាលនេះ ដូចនិស្សិតទូទៅដែរ ដោយមិនមានការរើសអើង ។

ដូច្នេះ ព្រះសង្ឃសមណនិស្សិតគ្រប់ព្រះអង្គ ក៏ដូចនិស្សិតគ្រប់រូប ដែលប្រាថ្នានិមន្តនិងចង់ទៅសិក្សានៅប្រទេសឥណ្ឌា ដែនដីពុទ្ធភូមិដ៏ពិសិដ្ឋ គួរឆក់យកឱកាសនេះ ដើម្បីបានអាហារូបករណ៍ឥណ្ឌា សម្រាប់ឆ្មាំសិក្សាឆ្នាំថ្មីខាងមុខនេះ ។ តែត្រូវតែត្រៀមខ្លួនឲ្យបានច្បាស់លាស់ ម៉ឹងម៉ាត់ហ្មត់ចត់ និងរៀបចំឯកសារឲ្យបានត្រឹមត្រូវ តាមលក្ខន្តិករបស់អាហារូបករណ៍ ។ ប្រើរយៈពេល ២ ខែនេះ ដើម្បីពង្រឹងនិងបំប៉នជំនាញភាសាអង់គ្លេសឲ្យអស់ពីសមត្ថភាព ។ សូមអានគន្លឹះសំខាន់ៗ និងដំណាក់កាលនៃការប្រព្រឹត្តទៅ នៃការប្រឡងជ្រើសរើសនិស្សិតអាហារូបករណ៍នៅទីនេះ ។

គន្លឹះជោគជ័យ៖

១-ឯកសារគ្រប់គ្រាន់ត្រឹមត្រូវតាមលក្ខន្តិក (fulfilled all required documents) ។
២-កម្រិតជំនាញភាសាអង់គ្លេសល្អ (at least workable English proficiency) ។
៣-ជ្រើសរើសសាកលវិទ្យាល័យបានត្រឹមត្រូវតាមឯកទេស និងលក្ខន្តិកសាលា (fulfilled universities' admission criteria) ។
៤-បីចំណុចខាងលើ អាស្រ័យការទទួលបានព័ត៌មានគ្រប់ជ្រុងជ្រោយ (adequate information about scholarship) ។

សូមមើលសេចក្ដីប្រកាសព័ត៌មានអាហារូបករណ៍ ដែលចេញផ្សាយដោយស្ថានទូតឥណ្ឌាប្រចាំ នៅរាជធានីភ្នំពេញខាងក្រោម សម្រាប់ព័ត៌មានលម្អិត ។ បើមានឯកសារសព្វគ្រប់ហើយ សូមចុះឈ្មោះ និងបំពេញទម្រង់អាហារូបករណ៍ តាមអនឡាញនៅគេហទំព័រនេះ៖ http://www.a2ascholarships.iccr.gov.in/ ។ សូមបញ្ជាក់ថា នៅលើគេហទំព័រនេះ មានព័ត៌មានសព្វគ្រប់សំខាន់ៗ ដែលទាក់ទងនឹងអាហារូបករណ៍ ។ សូមអានបំរាប់នានា មុនពេលបំពេញទម្រង់អាហារូបករណ៍ ។

បើមានសំណួរទាក់ទងនឹងដំណឹងអាហារូបករណ៍នេះ សូមទាក់ទងដោយផ្ទាល់ទៅកាន់មន្ត្រីស្ថានទូតឥណ្ឌា ឬអាចផ្ញើសារមកកាន់ទំព័រហ្វេសប៊ុកលោកវិទូ ឬបញ្ចូលមតិនិងសំណួរនៅក្នុងប្រអប់ខាងក្រោមនេះបាន ។ យើងខ្ញុំនឹងព្យាយាមឆ្លើយតប ដោយឆាប់រហ័សតាមដែលអាចធ្វើទៅបាន និងទទួលស្វាគមន៍ការប្រឹក្សាយោបល់ណាមួយបើចាំបាច់ ៕



© រក្សាសិទ្ធិដោយលោកវិទូ

No comments:

Post a Comment