 |
| ពិធីប្រគល់ជំនួយសម្ភារៈដែលធ្វើឡើងនៅកំពង់ផែក្រុងព្រះសីហនុ លោក B. Subba Rao លេខាទីពីរនៃស្ថានទូតឥណ្ឌា (ពីឆ្វេងទី២) និង ឯកឧត្តម ហង្សសាមឿន អនុប្រធានអចិន្ត្រៃយ៍នៃគណៈកម្មាធិការជាតិគ្រប់គ្រងគ្រោះមហន្តរាយ (ពីឆ្វេងទី៣), ក្រុងព្រះសីហនុ, ៣០ ធ្នូ ២០២០ ។ រូបភាព៖ ស្ថានទូតឥណ្ឌា |
លោកវិទូ | ថ្ងៃ ៤᧱២ ឆ្នាំជូត ទោស័ក ព.ស. ២៥៦៤ | ៣០ ធ្នូ ២០២០
ប្រវត្តិសាស្រ្តថ្មីមួយទៀតបានចារទុកនៅថ្ងៃនេះស្តីពីទំនាក់ទំនងដ៏រឹងមានរវាងកម្ពុជានិងឥណ្ឌា ខណៈនាវាកងទ័ពជើងទឹកឥណ្ឌា INS Kiltan បញ្ជូនសម្ភារៈសង្គ្រោះទឹកជំនន់ចំនួន ១៥ តោន ដែលមានឧបករណ៍ជំនួយក្នុងគ្រាទឹកជំនន់ចំនួន៣.០០០ឆុត សម្រាប់ប្រជាជនដែលរងផលប៉ះពាល់ដោយទឹកជំនន់នៅក្នុងប្រទេសកម្ពុជា។ ការមកដល់របស់នាវានៅកំពង់ផែក្រុងព្រះសីហនុនៅថ្ងៃទី ២៩ ខែធ្នូឆ្នាំ ២០២០ គឺជាផ្នែកមួយនៃដំណើរទស្សនកិច្ចសុច្ឆន្ទៈរបស់កងទ័ពជើងទឹកឥណ្ឌាមកកាន់តំបន់អាស៊ីអាគ្នេយ៍ក្រោមបេសកកម្ម ដែលមានឈ្មោះថា SAGAR-III ។
ក្នុងបេសកកម្មប្រកបដោយភាពស្និតស្នាលនិងសុឆន្ទៈ កងទ័ពជើងទឹកឥណ្ឌា INS Kiltan ត្រូវបានទទួលការស្វាគមន៍នៅកំពង់ផែសីហនុប្រកបដោយភាពកក់ក្តៅពីអង្គទូតមកពីស្ថានទូតឥណ្ឌារួមទាំងថ្នាក់ដឹកនាំកងទ័ពជើងទឹកកម្ពុជាដែលមានលោកឧត្តមនាវីត្រី អ៊ីន សុខេមរ៉ា នាយសេនាធិការរង តំណាងមូលដ្ឋានសមុទ្រកងទ័ពជើងទឹករាម និងនាយទាហានចំនួន ១៥ នាក់ទៀតផ្សេងទៀត។ មន្រ្តីមកពីអន្តោប្រវេសន៍និងមន្ត្រីកំពង់ផែក្រុងព្រះសីហនុក៏មានវត្តមានដើម្បីស្វាគមន៍កប៉ាល់នេះផងដែរ។
តំណាងអោយកងទ័ពជើងទឹកកម្ពុជា លោកឧត្តមនាវីត្រី អ៊ីន សុខេមរ៉ា បានសម្តែងស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់កងទ័ពជើងទឹកឥណ្ឌា INS Kiltan និងបានរំលឹកអំពីដំណើរទស្សនកិច្ចគ្រាមុនរបស់ខ្លួនមកកម្ពុជា ជាមួយនាវាមួយទៀតឈ្មោះ INS Sahyadri នៅខែកញ្ញាឆ្នាំ ២០១៩។ លោកក៏បាន និងបានថ្លែងអំណរគុណដល់ឥណ្ឌាកងទ័ពជើងទឹកឥណ្ឌានិងនាយទាហាន នាវិកនៃកងនាវាចរឥណ្ឌា Kiltan ទាំងអស់ ចំពោះកាយវិការមនុស្សធម៌តាមរយៈការផ្តល់ជំនួយសង្គ្រោះដល់ប្រជាជនកម្ពុជា។ លោកបានបន្ថែមទៀតថា ដំណើរទស្សនកិច្ចសុច្ឆន្ទៈក្នុងគ្រាលំបាកបែបនេះនឹងមិនត្រឹមតែពង្រឹងទំនាក់ទំនងទ្វេភាគីនិងទំនាក់ទំនងប្រជាជនរវាងឥណ្ឌានិងកម្ពុជាប៉ុណ្ណោះទេ ថែមទាំងនឹងនាំទៅរកការពង្រឹងកិច្ចសហប្រតិបត្តិការការពារជាតិរវាងប្រទេសទាំងពីរផងដែរ។ មេបញ្ជាការ Ponnappa ដែលជាមេបញ្ជានាវាបានថ្លែងអំណរគុណដល់កងទ័ពជើងទឹកកម្ពុជាចំពោះការស្វាគមន៍យ៉ាងកក់ក្តៅ។
នៅថ្ងៃទី ៣០ ខែធ្នូឆ្នាំ ២០២០ ក្នុងពិធីប្រគល់ជំនួយសម្ភារៈដែលធ្វើឡើងនៅកំពង់ផែក្រុងព្រះសីហនុ លោក B. Subba Rao លេខាទីពីរនៃស្ថានទូតឥណ្ឌាដែលតំណាងដោយឯកអគ្គរដ្ឋទូតឥណ្ឌាប្រចាំនៅកម្ពុជា លោកជំទាវ ឌេវយ៉ានី ខូប្រ៊ាហ្គាដេ និងតំណាងអោយរដ្ឋាភិបាលឥណ្ឌា បានប្រគល់ សម្ភារៈសង្គ្រោះទឹកជំនន់ចំនួន ១៥ តោនដល់ឯកឧត្តម ហង្សសាមឿន អនុប្រធានអចិន្ត្រៃយ៍នៃគណៈកម្មាធិការជាតិគ្រប់គ្រងគ្រោះមហន្តរាយនិងជាទីប្រឹក្សាសម្តេចតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា។ នៅក្នុងសុន្ទរកថាថ្លែងតំណាងអោយលោកជំទាវឯកអគ្គរដ្ឋទូតឥណ្ឌា លោក B. Subba Rao បានលើកឡើងអំពីការគាំទ្រឥតងាករេរបស់ឥណ្ឌាចំពោះប្រទេសកម្ពុជា មិនថាក្នុងកាលៈទេសៈបែបណានោះទេ ។ លោកក៏បានបញ្ជាក់ផងដែរថាជំនួយក្នុងទំរង់ជាសម្ភារៈសម្រាប់ការជួយពេលមានទឹកជំនន់គឺជាការបង្ហាញពីចំណងមិត្តភាពជារៀងរហូតរវាងប្រទេសទាំងពីរ។
លោកបានបន្ថែមថា ក្រៅពីសម្ភារៈជំនួយទឹកជំនន់ពីរដ្ឋាភិបាលឥណ្ឌា ស្ថានទូតឥណ្ឌាភ្នំពេញបានសហការជាមួយសហគមន៍ឥណ្ឌានិងសហគមន៍ធុរជនឥណ្ឌានៅកម្ពុជាបានបរិច្ចាគ សម្ភារៈស្បៀង និងថ្នាំសង្កូវដល់ប្រជាពលរដ្ឋរងគ្រោះដោយទឹកជំនន់នៅខេត្តកំពង់ឆ្នាំងនិងខេត្តបាត់ដំបងកាលពីខែវិច្ឆិកាឆ្នាំ ២០២០ ។ លោកបានបញ្ជាក់បន្ថែមទៀតថា ជំនួយដែលផ្តល់ដោយរដ្ឋាភិបាលឥណ្ឌានិងសហគមន៍ឥណ្ឌានៅកម្ពុជានឹងមិនអាចកាត់បន្ថយបានទាំងស្រុងនូវការបាត់បង់ដោយសារការរងគ្រោះទឹកជំនន់របស់កម្ពុជានោះទេ តែកាយវិការបែបនេះជាសារ សារបង្ហាញប្រាប់ប្រជាជនកម្ពុជាថារដ្ឋាភិបាលនិងប្រជាជនឥណ្ឌារមែងឈរនៅក្នុងស្មារតីសាមគ្គីភាពជាមួយប្រទេសដែលដូចជាបងប្អូនរបស់យើងដែលមានទំនាក់ទំនងជិតស្និតលើផ្នែវប្បធម៌ប្រពៃណី។
ក្នុងពិធីប្រគល់ទទួលយកសម្ភារៈជំនួយទឹកជំនន់ ក្នុងនាមរាជរដ្ឋាភិបាលកម្ពុជាឯឧ សាមឿនបានរំលឹកពីចំណងមិត្តភាពដ៏រឹងមាំរវាងប្រទេសទាំងពីរនិងបានថ្លែងអំណរគុណដល់រដ្ឋាភិបាលឥណ្ឌាដែលបានបង្ហាញកាយវិការសប្បុរសដើម្បីជួយដល់ប្រជាជនរងគ្រោះដោយទឹកជំនន់នៅកម្ពុជា។
ដំណើរទស្សនកិច្ចចូលចតរបស់នាវា INS Kiltan នៅកំពង់ផែក្រុងព្រះសីហនុសម្រាប់ការផ្តល់សម្ភារៈជំនួយទឹកជំនន់ចំនួន ១៥ តោនដល់ប្រទេសកម្ពុជាក៏ស្ថិតក្រោមបេសកម្មមួយដែលមានឈ្មោះថា SAGAR ដែលជាផ្នែកមួយនៃជំនួយមនុស្សធម៌និងជំនួយគ្រោះមហន្តរាយរបស់ប្រទេសឥណ្ឌាដល់ប្រទេសបរទេសជាមិត្ត [India’s Humanitarian Assistance and Disaster Relief (HADR)] ។ បេសកកម្ម SAGAR-III កំពុងត្រូវបានអនុវត្តស្របតាមចក្ខុវិស័យរបស់នាយករដ្ឋមន្រ្តីឥណ្ឌា លោក Narendra Modi ដោយផ្តោតទៅលើ សន្តិសុខនិងការលូតលាស់សម្រាប់ទាំងអស់គ្នានៅក្នុងតំបន់ (Security and Growth for All in the Region) ពាក្យកាត់ SAGAR ដែលភាសាហិណ្ឌីមានន័យថា "សមុទ្រ"។ វាបង្ហាញពីសារៈសំខាន់របស់ឥណ្ឌា ភ្ជាប់មកប្រទេសកម្ពុជានិងប្រទេសជិតខាងសមុទ្រដទៃទៀត។ ការចូលចតកំពង់ផែសម្រាប់ការផ្តល់ជំនួយសម្ភារៈ HADR ក្នុងគ្រាត្រូវការបែបនេះត្រូវបានគេរំពឹងថាមិនត្រឹមតែបង្កើនកិច្ចសហប្រតិបត្តិការតាមសមុទ្ររវាងកងកំលាំងការពារជាតិឥណ្ឌានិងកម្ពុជាប៉ុណ្ណោះទេថែមទាំងរួមចំណែកជាវិជ្ជមានដល់ការពង្រឹងចំណងមិត្តភាពរវាងប្រទេសទាំងពីរផងដែរ។
ការចូលចុះចតរបស់នាវា INS Kiltan នៅកំពង់ផែក្រុងព្រះសីហនុគឺចាប់ពីថ្ងៃទី ២៩ ខែធ្នូឆ្នាំ ២០២០ ដល់ថ្ងៃទី ០១ ខែមករាឆ្នាំ ២០២១៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment