 |
| អភិបាលខេត្តកណ្ដាល លោក គង់ សោភ័ណ្ឌ ថ្លែងក្នុងពិធីជួបជុំដោះស្រាយ ក្រោយពលរដ្ឋឃុំព្រែកអញ្ចាញជាច្រើនរយនាក់ នាំគ្នាតវ៉ាបិទផ្លូវជាតិលេខ៦អា, ១៩ មិថុនា ២០២០ ។ រូបភាព៖ ហ្វេសប៊ុកលោក គង់ សោភ័ណ្ឌ |
លោកវិទូ | ថ្ងៃ ៧᧿៧ ឆ្នាំជូត ទោស័ក ព.ស. ២៥៦៤ | ២០ មិថុនា ២០២០
ព្រះសង្ឃនិងពុទ្ធបរិស័ទចំណុះជើងវត្តមួយនៅខេត្តកណ្ដាល បានធ្វើបាតុកម្មតវ៉ារហូតឈានដល់ទៅបិទផ្លូវ ដើម្បីឲ្យអាជ្ញាធរចាត់វិធានការ ចំពោះករណីឈ្មួញដីបានជួលដីវត្ត ហើយដល់ថ្ងៃកំណត់មិនប្រគល់ឲ្យវត្តវិញ ។ អាជ្ញាធរខេត្តចុះអន្តរាគមន៍ ទុកពេលឲ្យ ៧ ថ្ងៃដើម្បីរុះរើចេញ និងប្រគល់ដីឲ្យវត្តវិញ ។
កាលពីថ្ងៃសុក្រ (១៩ មិថុនា) ព្រះសង្ឃនិងប្រជាពលរដ្ឋប្រហែលចំនួន ៦០០ រូបបានធ្វើបាតុកម្មបិទផ្លូវជាតិលេខ ៦អា ពីម៉ោង ៨ ដល់ ៩:៣០ នាទីព្រឹក នៅក្បែរទីតាំងបូបខ្សាច់ ដែលស្ថិតនៅតាមបណ្ដោយទន្លេមេគង្គ នៅក្នុងឃុំព្រែកអញ្ចាញ ស្រុកមុខកំពូល ខេត្តកណ្ដាល ។
ការបិទផ្លូវត្រូវបានបញ្ចប់ក្រោយពេលអាជ្ញាធរស្រុកបានទៅដល់ទីតាំងកើតហេតុ ហើយបានសន្យាថានឹងដោះស្រាយអធិករណ៍នេះ ដោយសុំឲ្យក្រុមហ៊ុនរើសរុះកន្លែងបូមខ្សាច់ចេញ និងដកយកសម្ភារចេញពីដីដែលជាកម្មសិទ្ធិរបស់វត្ត ។
យោងតាមការចុះផ្សាយរបស់សារព័ត៌មានកម្ពោជា (CamboJa) បានឲ្យដឹងថា គណៈកម្មការវត្តរតនបុប្ផារាមបានជួលដីវត្តឲ្យទៅស្ត្រីម្ចាស់អាជីវកម្មដេប៉ូលក់ខ្សាច់និងថ្មមួយរូបឈ្មោះ ឈឿន ម៉ានី ក្នុងឆ្នាំ២០១៥ ដើម្បីស្តុកខ្សាច់និងសម្ភារសំណង់ នៅពេលដែលក្រុមហ៊ុនបានបូបខ្សាច់នៅក្បែរនោះ ។
ព្រះគ្រូសូត្រឆ្នាំវត្តរតនបុប្ផារាម ព្រះតេជព្រះគុណ ឈឿន ម៉េងឈន់ បានថ្លែងបន្ទាប់ពីការតវ៉ាថា គណៈកម្មាធិវត្តចង់បានដីនោះមកវិញដើម្បីប្រើប្រាស់សម្រាប់ការជួបជុំនិងពិធីបុណ្យសាធារណៈ ។
ព្រះតេជព្រះគុណបានមានថេរដីកាថា កិច្ចព្រមព្រៀងរបស់គណៈកម្មាធិការក្នុងការផ្តល់ដីឲ្យក្រុមហ៊ុនរបស់អ្នកស្រីម៉ានីបានផុតកំណត់នៅថ្ងៃទី ១ ខែកក្កដាឆ្នាំ ២០១៩ ប៉ុន្តែអាជីវកររូបនេះបានបដិសេធមិនចាកចេញ ។ ព្រះតេជព្រះគុណបានបន្ថែមថា អ្នកស្រីម៉ានីបានចាប់ផ្តើមជួលដីទំហំ ៥.៥ ហិកតារ ក្នុងឆ្នាំ ២០១៥ ក្នុងតម្លៃ ៨០០ ដុល្លារក្នុងមួយឆ្នាំ ។
ព្រះតេជគុណម៉េងឈុនបានមានថេរដីកាថា «យើងចង់ទាមទារដីដើម្បីអភិវឌ្ឍវា សម្រាប់ការប្រារព្ធពិធីប្រពៃណី ប៉ុន្តែគាត់មិនបានយល់ព្រមចាក់ចេញ ។ ដីជាកម្មសិទ្ធិរបស់វត្តមិនមែនសម្រាប់បុគ្គលទេ» ។
ព្រះតេជព្រះតេជគុណបានបន្ថែមថា សមាជិកសហគមន៍ដឹងថាវាជាការខុសច្បាប់ក្នុងការបិទផ្លូវ ប៉ុន្តែគ្មានជម្រើសផ្សេងទៀតទេព្រោះអាជ្ញាធរមូលដ្ឋានមិនបានដោះស្រាយបញ្ហានេះ ទោះបីមានការស្នើសុំជាច្រើនដងកាលពីឆ្នាំកន្លងទៅក៏ដោយ ។
ព្រះតេជព្រះគុណបានមានថេរដីកាថា «អាជ្ញាធរមូលដ្ឋានបានត្រឹមពន្យារពេលហើយមិនបានដោះស្រាយបញ្ហា ដូច្នេះអ្នកភូមិចង់ជំរុញពួកគេឲ្យរកដំណោះស្រាយចំពោះបញ្ហានេះដោយបង្កើតការបិទផ្លូវ» ។
បន្ទាប់ពីការបិទផ្លូវត្រូវបានរំសាយ អភិបាលរងខេត្តកណ្តាលលោក នៃ ចារី បានចុះត្រួតពិនិត្យទីតាំងបូមខ្សាច់ និងបានបញ្ជាឲ្យអាជ្ញាធរមូលដ្ឋានចាត់ការផ្អាកប្រតិបត្តិការបូមខ្សាច់ជាបណ្តោះអាសន្ន ហើយរង់ចាំអាជ្ញាធរពិនិត្យមើលកិច្ចសន្យារវាងក្រុមហ៊ុនជាច្រើននិងគណៈកម្មការវត្ត ។
លោកបានមានប្រសាសន៍ថា «ទោះបីជាគាត់បដិសេធមិនចាកចេញក៏ដោយ យើងនឹងចាត់វិធានការផ្លូវច្បាប់ក្នុងការរុះរើឧបករណ៍ ពីព្រោះយើងត្រូវអនុវត្តច្បាប់ ។ ទោះជាយ៉ាងណាក៏ដោយ យើងត្រូវទុកពេលខ្លះសម្រាប់ពួកគេដើម្បីត្រៀមយកសម្ភារៈចេញ» ។
ក្រោយពីមានការតវ៉ាពីព្រះសង្ឃនិងពលរដ្ឋ អភិបាលខេត្តកណ្ដាល លោក គង់ សោភ័ណ្ឌ ប្រាប់អាស៊ីសេរីថា ការសម្រេចឲ្យឈ្មួញខ្សាច់រើចេញ ដោយសារអាជ្ញាធររកឃើញឯកសារថា គណៈកម្មការ អាចារ្យវត្ត បានជួលឲ្យឈ្មួញដី តែ៣ឆ្នាំទេ គឺបញ្ចប់ការជួលត្រឹមខែកក្កដា ឆ្នាំ២០១៩ តែឈ្មួញ មិនព្រមរើចេញនិងទាមទារសុំជួលដីវត្តបន្ត ដល់២០២៩ តែអ្នកភូមិ មិនឲ្យជួល ព្រោះការដឹកខ្សាច់ ធ្វើឲ្យហុយពាសពេញវត្ត និងប៉ះពាល់ដល់អ្នកភូមិក្បែរវត្ត៖
«អ៊ីចឹង ខ្ញុំបានសម្រេចហើយ សម្រេចតាមអ្វី ជាផ្លូវច្បាប់ តាមអ្វីជាការជួល ត្រូវឲ្យគរុភណ្ឌវត្តវិញ ឲ្យមកគណៈកម្មការ អាចារ្យវិញ ឲ្យមកព្រះគ្រូចៅអធិការវិញ ហើយឲ្យអាជ្ញាធរយើងធ្វើលិខិតស្នាមគ្រប់បែបយ៉ាង ទទួលស្គាល់ ប្រគល់ឲ្យព្រះគ្រូចៅអធិការ ទុកជាសម្បត្តិគរុភណ្ឌវត្តវិញ ។ រឿងមានប៉ិនហ្នឹងបង ហើយអ្វីៗ ឲ្យរុះរើជាបន្ទាន់ ក្នុងរយៈពេល៧ថ្ងៃ ។ ធម្មតាទេ ឲ្យគ្នារុះរើឲ្យស្រួល កុំឲ្យមានការបែកបាក់ ក្ដៅក្រហាយ អ៊ីចឹងអ៊ីចុះទៀតណាបង» ។
វិទ្យុអាស៊ីសេរីបានស្រង់ថេរដីកាព្រះតេជព្រះគុណ ឈឿន ម៉េងឈន់ យ៉ាងនេះថា ជាងមួយឆ្នាំផុតកុងត្រាមកនេះ ឈ្មួញខ្សាច់ មិនបានឲ្យថ្លៃឈ្នួលមកវត្តទេ ហើយបើទោះជាឲ្យយ ក៏ខាងវត្តមិនទទួលដែរ ព្រោះវត្តចង់យកដីមកថែរក្សាទុកវិញ។ តែយ៉ាងណា ព្រះអង្គសព្វព្រះទ័យចំពោះដំណោះស្រាយក្នុងការសម្រេចដកដីមកប្រគេនវត្តវិញ៖
«ក្នុងការដោះស្រាយរបស់អាជ្ញាធរខេត្តកណ្ដាល ដោយតំណាងនៃអភិបាលខេត្ត ញោម គង់ សោភណ្ឌ គឺល្អ ។ គាត់បានដោះស្រាយសាច់រឿងហ្នឹងល្អ ។ ព្រះចៅអធិការ គណៈកម្មការ អាចារ្យ ព្រមទាំងពុទ្ធបរិស័ទទាំង៦ភូមិហ្នឹង គឺគេទទួលយក និងគាំទ្រ និងត្រេកអរ នឹងការកាត់សេចក្ដី របស់ញោម អភិបាលខេត្ត ដែលបានកាត់សេចក្ដី ឲ្យដីគរុភណ្ឌហ្នឹង មកឲ្យវត្តយើងវិញ» ។
ព្រះគ្រូ ឈឿន ម៉េងឈន់ ប្រាប់ថា ខាងវត្តនឹងយកទីតាំងដាក់ខ្សាច់នោះ មកធ្វើជាកន្លែងធ្វើបុណ្យ ឲ្យពុទ្ធបរិស័ទជួបជុំគ្នា លេងកម្សាន្តពេលបុណ្យទាន និងអភិវឌ្ឍន៍ ជាបូជនីយដ្ឋានសាសនានៅពេលឈ្មួញរើចេញរួចរាល់ ៕
© រក្សាសិទ្ធិដោយលោកវិទូ
ព្រះគ្រូ ឈឿន ម៉េងឈន់ ប្រាប់ថា ខាងវត្តនឹងយកទីតាំងដាក់ខ្សាច់នោះ មកធ្វើជាកន្លែងធ្វើបុណ្យ ឲ្យពុទ្ធបរិស័ទជួបជុំគ្នា លេងកម្សាន្តពេលបុណ្យទាន និងអភិវឌ្ឍន៍ ជាបូជនីយដ្ឋានសាសនានៅពេលឈ្មួញរើចេញរួចរាល់ ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment