 |
| លោកជំទាវបណ្ឌិត Dr. Devyani Uttam Khobragrade ឯកអគ្គរដ្ឋទូតនៃសាធារណរដ្ឋឥណ្ឌា ប្រចាំព្រះរាជាណាចក្រកម្ពុជា (ឆ្វេង) និង សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ (ស្ដាំ), ព្រះបរមរាជវាំង, រាជធានីភ្នំពេញ, ២២ កុម្ភៈ ២០២១ ។ |
លោកវិទូ | ថ្ងៃ ៣᧬៤ ឆ្នាំជូត ទោស័ក ព.ស. ២៥៦៤ | ២៣ កុម្ភៈ ២០២១
នាវេលាព្រឹកថ្ងៃទី២២ ខែកុម្ភៈ ឆ្នាំ២០២១ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យប្រោសព្រះរាជទានអនុញ្ញាតឲ្យលោកជំទាវបណ្ឌិត Dr. Devyani Uttam Khobragrade ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឥណ្ឌា ប្រចាំព្រះរាជាណាចក្រកម្ពុជា អញ្ជើញចូលក្រាបថ្វាយបង្គំគាល់ និងសម្តែងការគួរសមនាព្រះបរមរាជវាំង។
ខណៈសព្វព្រះរាជហឫទ័យប្រោសប្រទានទទួលស្វាគមន៍ ព្រះវររាជមាតា បានអបអរសាទរនូវការតែងតាំង ជាឯកអគ្គរដ្ឋទូតឥណ្ឌាប្រចាំព្រះរាជាណាចក្រកម្ពុជា។ សម្តេចព្រះមហាក្សត្រី នរោត្តម មុនិនាថ សីហនុ បាន រំលឹកពីទំនាក់ទំនងយ៉ាងជិតស្និតរវាងអតីតព្រះមហាក្សត្រ និង អតីតឯកឧត្តមនាយករដ្ឋមន្រ្តី ចាវ៉ាហាឡាល នេរុ នាយករដ្ឋមន្រ្តីទីមួយឥណ្ឌា។ សម្តេចព្រះមហាក្សត្រី បានរំលឹកអនុស្សាវរីយ៍នូវដំណើរ ទស្សនកិច្ចទៅកាន់ប្រទេសឥណ្ឌានៅក្នុងទសវត្សរ៍ទី៦០ ជាពិសេសទៅកាន់ ទីក្រុងមុមបៃ និងទីក្រុង ឈៀងណៃ។
សម្តេចព្រះមហាក្សត្រីយានីបានសម្តែងនូវសេចក្តីរីករាយចំពោះទំនាក់ទំនងទ្វេភាគី ដ៏រឹងមាំរវាងប្រទេសទាំង ពីរនាពេលបច្ចុប្បន្ននេះ និង បានថ្លែងអំណរគុណដល់ប្រទេសឥណ្ឌាដែលបានគាំទ្រលើគ្រប់វិស័យនៃការចូល រួមទ្វេភាគីជាពិសេសក្នុងការជួសជុលប្រាសាទបុរាណរបស់ប្រទេសកម្ពុជា។
លោកជំទាវឯកអគ្គរដ្ឋទូត Dr. Devyani Khobragade បានថ្លែងអំណរគុណដល់ ព្រះមហាក្សត្រីព្រះវររាជមាតា នរោត្តម មុនីនាថ ចំពោះការស្វាគមន៍យ៉ាងកក់ក្តៅ និងបានប្រោសព្រះរាជទានពរជ័យរបស់លោកជំទាវឯកអគ្គរដ្ឋទូត សម្រាប់បេសកកម្មការទូតនៅប្រទេស កម្ពុជា។ លោកជំទាវឯកអគ្គរដ្ឋទូតបានជំរាបថ្វាយដល់ព្រះមហាក្សត្រីអំពីការងារដែលស្ថានទូត កំពុងបំពេញការងារលើវិស័យផ្សេងៗនិងបានថ្លែងថាក្នុងអំឡុងពេលដែលលោក ជំទាវត្រូវបានបំពេញការងារ នៅកម្ពុជាលោកជំទាវ នឹងខិតខំនាំយកនូវទំនាក់ទំនងទ្វេភាគីដ៏រឹងមាំដែលមានរួចហើយរវាងប្រទេសទាំង ពីរឱ្យឈានដល់ចំណុចដែលឲ្យគត់សម្គាល់ថ្មីមួយ។
ព្រះមហាក្សត្រីព្រះវររាជមាតាបានរាជទានអំណោយដល់ឯកអគ្គរដ្ឋទូតនូវសៀវភៅតន្ត្រីនិងខ្សែភាពយន្តជាច្រើនរួមទាំងជីវប្រវត្តិផ្ទាល់ខ្លួនរបស់ព្រះមហាក្សត្រីផងដែរ។ លោកជំទាវឯកអគ្គរដ្ឋទូត Dr. Devyani Khobragade បានថ្វាយនូវរូបគំនូរឥណ្ឌាដែលបានមកពីរដ្ឋអូរីសាដល់ព្រះមហាក្សត្រីយ។ លោកជំទាវឯកអគ្គរដ្ឋទូតក៏បានថ្វាយ នូវការយាងអញ្ជើញដល់ព្រះមហាក្សត្រីដើម្បីធ្វើទស្សនកិច្ចទៅកាន់ ប្រទេសឥណ្ឌាទៀតប្រសិនបើព្រះរាជសុខភាពរបស់ព្រះអង្គអនុញ្ញាតនោះ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment