 |
| សម្តេចព្រះពោធិវ័ង្ស អំ លីមហេង សម្ដេចព្រះសង្ឃនាយករងទី១ ព្រះប្រធានថេរសភា នៃព្រះពុទ្ធសាសនា នៅព្រះរាជាណាចក្រកម្ពុជា និងជាព្រះអគ្គាធិការរងពុទ្ធិកសិក្សាជាតិ ។ រូបភាព៖ ហ្វេសប៊ុក អគ្គាធិការដ្ឋានពុទ្ធិកសិក្សាជាតិ |
លោកវិទូ | ថ្ងៃ ៤᧿៥ ឆ្នាំកុរ ឯកស័ក ព.ស. ២៥៦៣ | ២២ មេសា ២០២០
គណៈសង្ឃនាយក នៃព្រះរាជាណាចក្រម្ពុជា បានបវារណាបច្ច័យចំនួន ៨.០០០.០០០៛ (ប្រាំបីលានរៀល) ដើម្បីប្រគេនព្រះសង្ឃនៅក្នុងខេត្តកំពតទាំង ២៩វត្ត ស្មើនឹង ១៧៥ អង្គទុកប្រើប្រាស់ជាបច្ច័យ ៤ តាមតម្រូវការចាំបាច់នានា ក្នុងគ្រាដ៏លំបាក ក្នុងវិបត្តិនៃជំងឺកូវដ-១៩នេះ ។
នៅក្នុងលិខិតរបស់សម្តេចព្រះពោធិវ័ង្ស អំ លីមហេង សម្ដេចព្រះសង្ឃនាយករងទី១ ព្រះប្រធានថេរសភា នៃព្រះពុទ្ធសាសនា នៅព្រះរាជាណាចក្រកម្ពុជា និងជាព្រះអគ្គាធិការរងពុទ្ធិកសិក្សាជាតិ ប្រគេនចំពោះព្រះសុសីលវង្ស ញ៉ែត ចន្ទតារា ព្រះរាជាគណៈកិត្តិយស និងជាព្រះជលធីវាសី ព្រះមេគណខេត្តកំពត មានសេចក្តីថា៖
«ដើម្បីចូលរួមចំណែកជាមួយរាជរដ្ឋាភិបាល នៃព្រះរាជាណាចក្រកម្ពុជា ក្នុងបេសកកម្មដ៏លំបាកក្នុងការការពារ ការរីករាលដាល នៃជំងឺកូវីដ-១៩ និងសុខទុក្ខប្រជាពលរដ្ឋខ្មែរ ជាពិសេសព្រះសង្ឃ ដែលងាយរងគ្រោះក្នុងវិបត្តិ នៃជំងឺនេះ គណៈសង្ឃនាយក នៃព្រះរាជាណាចក្រកម្ពុជា សូមប្រគេន ព្រះមេគណ និងសហការីគណ នូវបច្ច័យចំនួន ៨.០០០.០០០៛ (ប្រាំបីលានរៀល) ដើម្បីបវារណាប្រគេនព្រះសង្ឃទាំង ២៩ វត្ត ស្មើនឹង ១៧៥ អង្គ ទុកប្រើប្រាស់ជាបច្ច័យ៤ តាមតម្រូវការចាំបាច់នានា ក្នុងគ្រាដ៏លំបាកនេះ ។»
ជំនួយឧបត្ថម្ភនេះត្រូវបានធ្វើឡើង ក្រោយពីមានរបាយការណ៍ ចុះថ្ងៃទី២០ ខែមេសា ឆ្នាំ២០២០ របស់សាលាគណខេត្តកំពត អំពីការខ្វះខាតរបស់ព្រះសង្ឃ ដែលគង់នៅក្នុងខេត្តភាគខាងជើងរបស់កម្ពុជាមួយនេះ ។ នេះជាការរួមចំណែកដោយផ្ទាល់ របស់គណៈសង្ឃនាយក នៃព្រះរាជាណាចក្រកម្ពុជា ក្នុងគ្រាមានវិបត្តិជំងឺកូវីដ១៩ ក្រៅពីការចូលរួមបរិច្ចាគថវិកា ជាបន្តបន្ទាប់ដល់អាជ្ញាធរជាតិប្រយុទ្ធប្រឆាំងនឹងជំងឺកូវីដ១៩ ។
អស់រយៈពេលប្រមាណជិត ៥ ខែមកហើយ ជំងឺកូវីដ១៩នៅតែបន្តរីករាលដាលខ្លាំង នៅលើសកលលោកនៅឡើយ និងបានផ្ដាច់អាយុសង្ខារមនុស្សអស់ជាង ១៧ ម៉ឺននាក់ ក្នុងចំណោមអ្នកឆ្លងជាង ២,៥ លាននាក់ក្នុងចំនួន ២១០ ប្រទេសក្នុងសកលលោក ។ ជំងឺនេះកំពុងធ្វើឲ្យប៉ះពាល់ដល់សុខមាលភាពប្រជាជនទូទាំងពិភពលោក និងប៉ះពាល់ដល់សង្គមនិងសេដ្ឋកិច្ចពិភពលោកយ៉ាងធ្ងន់ធ្ងរ ។
ដោយឡែកនៅប្រទេសកម្ពុជាមិនមានរបាយការណ៍ អំពីករណីនៃការឆ្លងជំងឺកូវីដ១៩ទេ ក្នុងរយៈពេលមួយសប្ដាហ៍ចុងក្រោយនេះ ។ ស្ថិតិករណីឆ្លងសរុប ១២២ ជាសះស្បើយ ១១០ និងស្លាប់គ្មាន ។ ទោះយ៉ាងណា កម្ពុជាកំពុងចួបវិបត្តិសេដ្ឋកិច្ចយ៉ាងធ្ងន់ធ្ងរ ដោយសារផលប៉ះពាល់ពីជំងឺកូវីដ១៩ និងកត្តាដទៃទៀត ដែលអង្គការហិរញ្ញវត្ថុអន្តរជាតិ (IMF) បានព្យាករណ៍ថា សេដ្ឋកិច្ចកម្ពុជាអាចធ្លាក់ចុះដល់ -១,៥ ភាគរយ នៅឆ្នាំ២០២០ ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment